ҮӨҺЭЭ БҮЛҮҮ ЛИЦЕИСТАРА САҤА АРЫЛЛЫБЫТ ТЕХНОПАРКАҔА ДЬАРЫКТАРА САҔАЛАННА
Балаҕан ыйын 10-12 күннэригэр Үөһээ Бүлүүтээҕи М.А. Алексеев аатынан өрөспүүбүлүкэтээҕи лиссиэй-интэринээтигэр Инжеквантум үөрэҕин ыыттылар. Кванториум оҕо технопаркатыгар Дьокуускай куораттан Варвара Васильева салайааччылаах Оҕо дыбарыаһын уһуйааччылара үлэлээтилэр.
Үөһээ Бүлүүгэ ыытыллыбыт Инжеквантум үөрэҕэр уопсайа биэс хайысхаҕа 47 үөрэнээччи, 4 учуутал дьарыктанна. Бэрт интэриэһинэй Робоквантум хайысханы Семен Гаврильев салайда, оҕолор Arduino микроконтроллеры бырагыраамалыырга, роботехническэй платформаны оҥорорго үөрэннилэр. Онтон Геоквантум уонна IT-квантум Черосов Борис Михайлович ыытта. Геоквантумҥа оҕолор каартаны дешефрирование оҥорорго уонна виртуальнай каартаны оҥорорго, IT-квантумҥа компьютернай оонньууну оҥорор бырагырааманы уонна Web-программирование html тылын кытта үлэлииргэ үөрэннилэр. Hi-tech квантумҥа Владимир Степанов 3D-моделированиенан дьарыктаата. Манна оҕолор араас предметтэр мадьыалларын компьютерга уонна 3D-сканердаан оҥорон 3D-принтерга бэчээттээн таһаара үөрэннилэр. Soft skills квантумҥа хамаандаҕа үлэлииргэ, бырайыак оҥорорго Ульяна Ощепкова олус интэриэһинэйдик, сэргэхтик үөрэттэ.
Лиссиэй-интэринээт дириэктэрэ Нина Федотова:
— Быйылгы үөрэх сылыгар лиссиэйгэ арыллыбыт технопарканы толору дьарыктыыр сыалтан, биһиги үс ыстааты бэйэбититтэн көрүнэн, учууталлары үлэлэтэн эрэбит. Онон бу ыытыллыбыт үөрэх төһүү күүс буолуоҕа диэн эрэнэбит.
Куораттан кэлбит уһуйааччылар оҕолор үөрэххэ көхтөөхтөрүн, бэриллибит сорудаҕы түргэнник ыланан оҥороллорун бэлиэтээтилэр.
Ааптар: Валентина Догоюсова
