МЭҤЭ ХАҤАЛАС МЭЛДЬЭХСИТИГЭР САЙЫҤҤЫ КУРУҺУОК ОҔОНУ ҮЛЭҔЭ ҮӨРЭТЭР
Сайыҥҥы кэмҥэ оҕо дьарыктаах буолуутун ситиһэргэ сынньалаҥ, үлэ лааҕырдара Мэҥэ Хаҥалас улууһугар үлэлииллэр. Ол эрээри лааҕырынан хабылыбатахтар син биир аҕыйаҕа суохтар. Мэлдьэхси бөһүөлэгэр култуура киинин дириэктэрэ, элбэх оҕолоох ийэ Матрена Сыромятникова, исписэлииһин Анна Сосинаны кытта күннээҕи куруһуок тэрийэн үлэлэтэллэр.
Мэлдьэхси бөһүөлэгэр тэриллибит «Үрдэл» диэн ааттаах куруһуок от ыйын 30 ‒ атырдьах ыйын 13 күннэригэр 5‒13 саастаах 22 оҕону хапта. Бу тэрээһиҥҥэ олохтоох эрэ нэһилиэктэн буолбакка, эбэлэригэр эһэлэригэр Майаттан, Дьокуускайтан, оннооҕор Абый оройуонуттан сайылыы кэлбит оҕолор бааллар. Куруһуок хайысхата элбэх. Манна сылдьааччылар ыллыыллар, үҥкүүлүүллэр, кыбыстыбат буоларга, олоҥхону болҕойон истэргэ, иистэнэргэ, төлөпүөн хаатын киэргэтэргэ, хаартыскаҕа түһэрэргэ үөрэммиттэр, нэһилиэк талааннаах дьонун кытта көрсүспүттэр, бибилэтиэкэттэн кинигэ уларсан айылҕаҕа баран аахпыттар, олохтоох ааптардар хоһооннорунан тэрээһиҥҥэ кыттыбыттар, кэрэттэн кэрэ Суола үрэҕин уруһуйдаабыттар.
‒ Биһиэхэ «Үс кут» устудьуоннар тутар этэрээттэрин мэдиссиинэ факультетытагр үөрэнэр кыргыттар оҕолорго гигийиэнэ, тииһи эрдэттэн хайдах харыстыыр туһунан лиэксийэ аахпыттара. Кинилэри кытта кыттыһан бу ый ортото ыалдьар оҕоҕо эмтэнэ барарыгар аһымал-аахсыйа тэрийиэхтээхпит. Бу кэнсиэргэ нэһилиэкпит эдэр ыччата, бэтэрээннэрбит эмиэ кыттыахтара. Маны таһынан Көҥүл өртүнэн көмөлөһүү сылын чэрчитинэн бэйэбит кыракый кылааппытын киллэрсэн, ыһыахтыыр сири хомуйдубут, үрэҕи туоруур муостаны талаҕынан киэргэттибит, нэһилиэк иһин, оонньуур былаһааккабыт аттынааҕы сири ыраастаатыбыт, эмтээх оттору, моонньоҕон сэбирдэҕин, оһох отторго куулунан туос хомуйан кырдьаҕастарга: 85 саастаах тыыл бэтэрээнигэр, култуура туйгунугар Мария Колесоваҕа, тыыл бэтэрээнигэр Иван Кривогорницыҥҥа, быйыл ыал буолбуттара 60 сылларынан Сокольниковтар дьиэ кэргэҥҥэ бэлэхтээтибит. Нэһилиэккэ тутуллуохтаах саҥа фонтан хайдах буолуохтааҕын оҕолор уруһуйдаан бэйэлэрин идеяларын көрдөрдүлэр. Быйыл саҥа үлэлээбит куруһуокпут көдьүүстээҕэ билиннэҕинэ, эһиилги былааммыт өссө киэҥ. Оҕону патриот тыыныгар иитиигэ оҥоһуллубут анал бырайыак иһинэн үлэлиэхпит, сайыаннарыахпыт, ‒ диэн Матрена Робертовна сырдатта.
Сайыҥҥы лааҕырдары сэргэ күннээҕи куруһуок курдук оҕо сайыҥҥы өртүгэр дьарыктаах буолуутун хааччыйар тэрээһиннэр атын нэһилиэктэргэ өссө элбээн иһэллэрэ буоллар. Оччоҕуна үгүс кырачаан сынньалаҥын туһалаахтык уонна сэргэхтик атаарыах этэ.
Ааптар: Виктория БЕЛОЛЮБСКАЯ.
