Skip to content

АНОНС

Открылся канал нашего портала в Ютубе - Канал «Якутия. Образ будущего»

ОЛОҤХО ТЫЙААТЫРА ТААТТА МУҤХА ДЭЛБЭРИЙБИТИТТЭН ГРЕЦИЯҔА ОЛОҤХОЛООХ ТИИЙИЭҔЭ

СӨ Судаарыстыбаннай Сүбэһитэ Андрей Борисов салалтатынан Олоҥхо тыйаатырын айар бөлөҕө Таатта улууһугар Платон Ойуунускай төрөөбүт сиригэр Чөркөөххө Муҥха Дэлбэрийбит алааһыгар сырыттылар. Ойуунускай төрөөбүт, улааппыт балаҕаныгар чэйдээн, арыылаах, саламааттаах итии алаадьы сиэн, буор кутугар, пааматынньыгар сүгүрүйэн, сибэкки дьөрбөтүн ууран, үөрэммит оскуолатын паарталарыгар олорон, ол кэмҥэ сылдьыбыт кэриэтэ сананан, ыраах Греция сиригэр түҥ былыргыттан билиҥҥэ диэри дьону сүдүтүнэн абылыыр античнай тыйаатырга олоҥхолуу барарга көҥүл ыларга көрдөһөн-ааттаһан аастылар.


Таатта улууһун Муҥха Дэлбэрийбит алааһыгар Саха театральнай искусствота, духуобунай култуурата билиҥҥэ диэри уратытык сайдан-чэчирээн кэлиитигэр сүдү кылаатын киллэрэн үлэлии-хамсыы, айа-тута сылдьар Андрей Борисов саха талааннаах ыччата олоҥхоҕо айар күүһэ өссө эрчимирэрин, этэ-хаана аһыллан, өйө-санаата сааһыланарын туһугар көрдөстө. Бу күн олоҥхону ураты тыыннаан сайдар артыыс ыччат, кинилэр салайааччылара Былатыан Ойуунускай «Көтөрдөрүн мөккүөрүгэр», Халамнаайыга турар «Дьулуруйар Ньургун Боотуругар», «Оҕо куйуурдуу турарыгар», Ытык Күөлгэ кэнники туруоруллубут улахан пааматынньыкка сүгүрүйдүлэр.

Чулуу киһибитигэр уонна билигин олоҕу уһансар бар дьоҥҥо, тыйаатыр искусствотыгар сүгүрүйээччилэргэ Андрей Саввич кэс тылын эттэ.

Ойуунускай аатын сүгэр Таатта норуодунай тыйаатырын сценатыгар хас да олоҥхоттон быһа тардыыны ис-истэриттэн аһыллан толордулар. Кылгас испэктээкиллэр быыстарыгар Андрей Борисов Таатта дьонугар-сэргэтигэр, «Таатта улууһа» муниципальнай оройуон баһылыга Михаил Соровка махтал суруктары туттарда. Улуус баһылыга талааннаах салайааччыга ыраах сиргэ этэҥҥэ айаны баҕаран, бары артыыстарга махтанан, Андрей Саввичка талах олоппоһу, Таатта символын Аал-Луук мас өйдөбүнньүк мөссүөнүн бэлэх уунна.

Таатта кыраайы үөрэтэр мусуойугар сылдьан улуус устуоруйатын, баай ис хоһоонноох экспозицияларын сөҕө-махтайа көрдүлэр-иһиттилэр, айарга, оҥорорго саҥа күүһү ыллылар.

Биһиги, Таатта дьоно, аан дойдуга билиниллибит саха чулуу айымньытын- олоҥхобутун-өркөн өйдөөхтөр, чулуу талааннаахтар, ураты дьоҕурдаахтар төрөөн-үөскээн ааспыт сирдэригэр Грецияҕа тиийэн өссө үчүгэйдик көрдөрөллөрүгэр алгыы хааллыбыт.

Олоҥхо тыйаатыра Тааттаҕа сырыытын туһунан «Таатта»хаһыакка сиһилии ааҕыҥ.

Ааптар: Виктор ВИНОКУРОВ.

Оставить комментарий

Войти с помощью: