Skip to content

АНОНС

Открылся канал нашего портала в Ютубе - Канал «Якутия. Образ будущего»

АЛРОСА үлэһиттэрэ “Алтай. Точки Роста” форумҥа кытыннылар

Белокуриха куоракка “Алтай. Точки Роста” Норуоттар икки ардыларынааҕы эдэр салайааччылар форумнара буолан ааста. Манна 28 дойдуттан уонна Арассыыйа Федерациятын 50 эрэгийиэниттэн барыта 2500 киһи кыттыыны ылла.

 

Бу форум Арассыыйаҕа эдэр талааннаах салайааччылар кэскиллээх хамаандаларын бэлэмниир сыаллаах соҕотох былаһаакканан буолар.   Тэрээһин булгуччулаах бырагыраамата түөрт хайысхалаах: “Эн – урбаанньыккын”, “Менеджмент”, “Социальнай технологиялар” уонна “Айымньы”. Бу хайысхалар чэрчилэринэн 26 былаһаакка үлэлээтэ, барыта 260-тан тахса эксперт форум кыттыылаахтарын боппуруостарыгар хоруйдаатылар.

Форумҥа икки АЛРОСА бэрэстэбиитэллэрэ — Каадырдары бэлэмниир киин инженерэ Елена Бруй уонна Юридическай киинтэн юрист-консультант Лидия Батышева кыттыыны ыллылар.

АЛРОСА дэлэгээтэ Елена Бруй “Росмолодежь” Ыччат дьыалаларыгар федеральнай ааҕыныстыба экспертэрин иннигэр “Делфест” бырайыагы ситиһиилээхтик билиһиннэрдэ. Бу эдэр исписэлиистэр лиидэрдии хаачыстыбаларын сайыннарыыга туһуламмыт бырайыагы экспертэр олус сэргээтилэр уонна олус сыаналаах сүбэлэри биэрдилэр — бырайыагы киэҥ араҥаҕа тарҕатыыга, сорох түгэннэрин тупсарыыга.

а2

Елена форум туһунан маннык диир:

«Урукку өттүгэр мин кыттыбыт атын бэстибээллэрбиттэн уонна форумнарбыттан «Алтай. Точки Роста»форум спикердэри кытта алтыһыыга ханнык да чопчу кыраныыссата суоҕунан уратылаах. Бу олус үчүгэй. Лиэктэргэ ким баҕарар интэриэһиргиир боппуруоһун хаһан баҕарар биэриэн сөп. Атыннык эттэххэ, лиэксийэ бүппүтүн да иһин, уһуйааччыны кытта алтыһыы тохтоон хаалбат. Маннык аһаҕас алтыһыы киһини тардар. Тоҕо диэтэххэ, эйигиттэн уопуттаах биир санаалаахтаргын кытта “биир долгуҥҥа” сылдьарыҥ үчүгэй буоллаҕа. Миэхэ маннык түгэн ордук өйбөр хатанан хаалла. Профсойуус тэрилтэлэригэр аналлаах факультативка сырыттахпына форум биир кыттыылааҕа Арассыыйа Федерациятын үрдүнэн ханнык профсойуус тэрилтэтин кэлэктиибинэй дуогабара үчүгэйдик оҥоһуллубутуй диэн экспертэн ыйытта. Онуоха эксперт маннык хоруйдаата: “Анаалыс көрдөрбүтүнэн, Саха сиригэр баар алмааһы хостуур АЛРОСА хампаанньа уонна “Профалмаз” профсойуус икки ардыларыгар түһэриллибит кэлэктиибинэй дуогабар”. Онуоха биһигини ханна баҕарар билэллэриттэн уонна үчүгэйинэн эрэ ахталларыттан олус киэн тутта санаатым. Форумҥа мин олус бэрт уопуту ыллым — тэрийэр дьоҕурбун көрдөрөргө, хамаанданан үлэ сатабылларыгар. Ону кытта олус элбэх интэриэһинэй дьону кытта билистим, сүүнэ далааһыннаах тэрээһиҥҥэ кытынным».

Форум кэмигэр үгэс буолбут Бүтүн Арассыыйатааҕы ыччат бырайыактарын куонкурса буолла. Финалга тахсыбыттар 100, 200, 300 тыһыынча грант ыллылар, оттон “Олоххо киирбит бастыҥ бырайыак” номинация кыайыылааҕа туһааннаах хайысханан кыраныысса таһыгар стажировка ааһыаҕа. Форумҥа бэриллибит грант уопсай суумата быйыл түөрт мөлүйүөн солкуобайга тиийдэ.

Дмитрий Михайлов

Оставить комментарий

Войти с помощью: