НЬУРБАҔА ОҔО КӨМҮСКЭЛИН КҮНҮГЭР КӨРДӨӨХ-НАРДААХ ТЭРЭЭҺИННЭР ЫЫТЫЛЫННЫЛАР
Ньурбаҕа Оҕо көмүскэлин күнүн бэлиэтиир оҕо саас улахан бырааһынньыга ыытылынна. Эҕэрдэ кэнсиэр быыһыгар эбии үөрэхтээһин өртүнэн ситиһиилээх оҕолорго, «Письмо солдату» аахсыйа кыттыылаахтарыгар туоһу, махтал суруктар туттарылыннылар.
«Сахамедстрах» Ньурбатааҕы филиалын салайааччыта Н.Ю. Николаева «Коробка храбрости» аһымал аахсыйа чэрчитинэн киирбит 600-чэ оҕо оонньуурун улуустааҕы киин балыыһаҕа, «Арчы» оҕо киинигэр, Араҥастаахтааҕы оскуола-саадка уонна доруобуйаларынан хааччахтаах оҕолор реабилитационнай кииннэригэр туттарда.
Күн устата флешмоб, театрализованнай көрдөрүү, кэнсиэр, аква-гримм аахсыйата, спартакиада, футбол, дьиэ кыылын быыстапката, квест-оонньуу, күрэхтэр о.д.а. араас көрдөөх-нардаах тэрээһиннэр ыытылыннылар.
Мустубут кырачааннары үөрүүлээх күнүнэн оройуон баһылыгын социальнай боппуруостарга солбуйааччы э.т. В.С. Халанникова, куорат баһылыгын э.т. Д.А. Михайлов, улуустааҕы үөрэх управлениетын салайааччытын солбуйааччы Н.А. Иванов эҕэрдэлээтилэр.
Оҕо саас күнэ киэһэтин «Кыталык» культура дыбарыаһыгар «Мини мисс и мистер» кэрэ көстүү уонна талаан күрэҕинэн түмүктэниэҕэ.
Ааптар: Александра ВАРЛАМОВА.
