Тускул: Саха сиригэр кэлэр нэдиэлэҕэ халлаан тымныйара күүтүллэр
НВК САХА – Бүгүн, муус устар 20 күнүгэр, айанныырга уонна дьыаланы тэринэргэ табыгастаах күн. Саха сиригэр кэлэр нэдиэлэҕэ халлаан тымныйара күүтүллэр. Маннык диэн норуот билгэһитэ, синоптик Тускул “Саха” НКИХ биэриитигэр эттэ.
“Ый дьайыыта бүгүн, муус устар 20 күнүгэр, айанныырга, дьыаланы тэринэргэ олус табыгастаах. Күн тардыыта эмиэ доруобуйаҕа туһалаах кэмэ”, – диэтэ Тускул.
Маны таһынан Тускул муус устар 20 күнүттэн 26 күнүгэр диэри халлаан туругун кэпсээтэ. Кини этэринэн, аныгыс нэдиэлэ ортотуттан бары оройуоннарга халлаан тымныйара күүтүллэр.
Ол курдук киин оройуоннарга түүҥҥү өттүгэр -10,-11 кыраадыска тиийэ тымныйар. Ол гынан баран бэнидиэнньиккэ уонна оптуорунньукка күнүскү өттүгэр сылыйар, сэрэдэҕэ, чэппиэргэ тымныйан, күнүһүн -2,-3 кыраадыска тиийиэ, түүнүн -8,-7 буолуо.
Бүлүү эҥээр оройуоннарга билигин сылыйан турар. Ол курдук күнүскү өттүгэр +4,+9 кыраадыс, ол гынан баран кэлэр нэдиэлэ сэрэдэтигэр уонна чэппиэригэр тымныйан, күнүһүн -4,-5 тымныы буолар.
Соҕуруулуу-арҕаа оройуоннарга эмиэ билигин балай даҕаны сылыйан эрэр. Ол курдук онно +12,+14 кыраадыс сайыҥҥылыы сылаас буолан эрэр, түүҥҥү өттүгэр -5,-1 кыраадыс. Ол гынан баран эмиэ кэлэр нэдиэлэ сэрэдэтигэр уонна чэппиэригэр күнүһүн 0, -2 кыраадыс тымныы буолар.
Өймөкөөҥҥө эмиэ сылыйда. Кэлэр нэдиэлэҕэ эмиэ -6,-5 кыраадыс буолара күүтүллэр.
Дьааҥы эҥээр оройуоннарга билигин сылаас. Күнүһүн +4,+7 кыраадыс буолла. Оттон кэлэр нэдиэлэ ортотугар күнүһүн -3,-1 буолара күүтүллэр. -кс
