Skip to content

АНОНС

Открылся канал нашего портала в Ютубе - Канал «Якутия. Образ будущего»

Ытык кыылы – Эһэни сыапка баайан туран ытынан үрдэрэр сатаммат!!! (тус бэйэм санааларым).

Винокуров Петр Петрович, адвокат (Мегино- Кангаласский улус).
7.02.2018 г.

Саха сирин олохтоох дьонугар Эһэ олохторугар кутталы үөскэтэр диэн дойҕоҕу утаран туран манныгы этэбин.
Былыр аас туор олоххо, ас-таҥас тиийбэт, кырдьык кыһалҕалаах кырыымчык кэмигэр Эһэни тыыннаах буолар туһуттан, ыраах үрэх бастарынан ыһыллан олорор эрдэхтэринэ, ону да улахан кыһалҕаттан бэрт аҕыйах булчут бултууллара.
Билигин оннук кыһалҕа суох. Эргиэн араас точкаларыгар, супермаркеттарыгар күн талбыта толорутун этэ даҕаны, ааҕа да барыллыбат.
Билигин Эһэни бултуубут, эбэтэр бултаатыбыт дэнээччилэр халыҥ харчы хаһаастаахтарын, муҥур былаастаахтарын билинэр буолбут ГосСлужба чиновниктара судаарыстыба үбүгэр босхо тэриллэрин (бөртөлүөт…) туһаналлар. Кинилэртэн хаалсымаары аныгы туора байбыт “сахалар” онтукалара эрэ итэҕэс буолан, бэйэ-бэйэлэригэр киһиргэс оҥостон, чабыланарга анаан бултаһаллара кистэл буолбатах. Аан дойду олигархтарын үтүктэн Африка саванналдарыгар бултуур буолбуттара ыраатта. Билиҥҥи автомат, пулемет тэҥэ сыаналаах, күүстээх саалаах-сэптээх сылдьан тугу харыстыахтарай? Арай, былыргы үгэһи үөдүтэбит диэн ааттаан үҥүүнэн, тайыынан бултуургут эбитэ буоллар баҕар өйдөнүллүө этэ.
Олохтоохтор Эһэ да диэбэттэр. Төрүт өбүгэлэрбит ытыктаан Кырдьаҕас диэн ааттыыллара. Ол аата Аар Айылҕа аргыһа мээнэ тыытыллыбат ИЧЧИ диэн сэрэтэллэрэ.
Былыр да, билигин да Эһэ дьоҥҥо олохторугар кутталы үөскэппитэ, суоһаабыта диэн суоҕа.
Билиҥҥи кэмҥэ Эһэ суолга тахсара, свалкаҕа кэлэрэ кыыллар Айылҕаларын тутулун кэһиллиитин туоһута.
Тоҕо диэтэххэ, үчүгэй экологическай экспертизата суох араас мега проектары талбыттарынан туталлар. Холобура, тимир суол, муоста тутууларыгар аналлаах матырыйааллар карьердара, газ, нефть турбатын тутуута диэн ааттаан араас хайысхалаах дэлби тэптэриилээх үлэлэри элбэх сыл эргиччи ыыта тураллар. Ол түмүгэр араас кыыл майгыта-сигилэтэ кэһиллэр.
Холобура, эйиигин утуйа сыттаххына кэлэн үнтү дибдий эрэ, эн да майгыҥ- сигилиҥ отуора ама хамсаабат буолуо дуо?
Маны тэҥэ тайах, таба оннооҕор саһыл, саарба бу тутуулартан мэһэйдэтэн төрүүр-ууһуур, кыһынын кыстыыр, сайын мэччийэр төрүүр-үөскүүр түөлбэтэ уларыйарыттан отуора алдьанар, мэһэйдэтэр.
Балары тоһоҕолоон этэн туран, Кырдьаҕаһы ытынан көччүргээн, буолаары буолан бултка, бэйэлэригэр эрэ болҕомто таттараары Эһэҕэ үрдэрэ үөрэтии туһалаах диир дойҕоҕу булгуччу утарабын!!!
Тэллэх ыта, дьиэ ыта диэннэри төһө да дрессировкалаан булчут ыт оҥорбоккун.
Холобура диэн эттэххэ, мин тус бэйэм табаарыһым Уус-Маайа улууһун Күп ыччата Николай Спиридонов аймаҕа булчуттан, ыт оҕото бэлэхтэтэн турабын. Ити 1974 с кыһын Нуотара үрэххэ, Күптэн үс көстөөх сиргэ дьиэ кэргэнинээн олороро. Анаан алҕаан бэлэхтээбитэ уонна эппитэ: Бу ыт ситэн улааттаҕына туох да анал үөрэтиитэ суох тайахха, саарбаҕа барыаҕа, Эһэни да бултатыаҕа. Ону олох итэҕэйбэккэ туран ылбытым, кэлин эппитин курдук бултка баҕалаах үтүө доҕор буолбута.
Булчут ыт диэн ис хааныттан (генетически) булчут буолар.
Өссө иккис холобурум маннык:
Кэлин 90-с сылларга эмиэ Уус-Маайа Белькачытыттан төрүттээх, Павловскайга олорор Владимир Атласов диэн табаарыһым дьонуттан эмиэ ыт оҕотун ылбытым. Биэрэллэригэр хараҕын саҥа көрөн эрэрэ, эмиэ «саарбаттан саҕалаан бары бултка барыа…”, – диэн биэртэрэ, эппиттэрин курдук буолбута. Ону Мэҥэ-Хаҥалас Табаҕатыгар олорор Павел Егоровка 8 ыйдааҕар бэлэхтээбитим “бэркэ саарбаҕа барар”, – диэн хайҕаан бөҕөтө этэ. Кэлин дьон уоран күрэттилэр диэн хомолтотун этэрэ.
Итилэри холобурдаан туран өссө төгүл тоһоҕолоон дьон билиитигэр этэбин, кэпсиибин. Билигин да иитэр ыттарым бэйэлэрэ тугу бултуурбунан, туох да анал такайыыта суох ис хааннарыттан ылынан бараллар.
Бу олохпор буолбут холобурдарга олоҕуран туран, хаайан туран Эһэни моору оҥорууну тохтотору модьуйсабын!!!
Мин 70-чалаах киһи билэрим, истэрим тухары Эһэ дьоҥҥо саба түспүтэ диэн суох. Хата дьон оҕотун өлөрөн, бэйэтин бааһырдан кыынньыыллара кистэл буолбатах. Ити үлүгэрдээххэ түбэспит Эһэ майгыта алдьанара кэмнээх буолуо дуо? Сороҕор көмүскэнэн, тыынын харыстанан киһини кэһэппитэ өс саас ситиһиитинэн сыаналаныа суохтаах.
Маны дьон-сэргэ туох диэн саныырый?
Хаһыат, СМИ ҥөҥүө санааҕытын этиҥ.
Аар Тайҕа иччитин, маанылаах аргыһын “трави, истреби” гынары тохтотуоҕуҥ!

Оставить комментарий

Войти с помощью: