Skip to content

АНОНС

Открылся канал нашего портала в Ютубе - Канал «Якутия. Образ будущего»

Ярослава уонна Венера – Ньурба тыйаатырыгар

Бу күннэргэ Дьокуускайга Ньурбатааҕы судаарыстыбаннай көһө сылдьар драматическай тыйаатыр ыалдьыттыыр. Быйылгы гастролларын репертуарыгар саха классиктарыттан саҕалаан, Шекспир айымньыларыгар тиийэ испэктээкиллэр баһылыыллар.


Арай, биир мөккүөрдээх, көрөөччү ылбычча ылыммат пьесалардаах драматург Ярослава Пулинович «Дальше будет новый день» пьесата репертуарга киирбит. Ярослава Пулинович – билиҥҥи кэм эдэр драматурдарыттан биир саамай биллибиттэрэ уонна биһирэммиттэрэ. Кини пьесаларын Москваҕа, Санк-Петербурга, Арассыыйа куораттарыгар, АХШ, Англияҕа, Польшаҕа уо.д.а. дойдуларга туруораллар. Кириитиктэр Пулинович пьесаларыгар хаҕыс сыһыан элбэҕин, уйан санаа ханан да сыстыбатын бэлиэтииллэр.

nurba-2

Ньурба тыйаатырын эдэр артыыстара аныгы олох мөкү өрүттэрин хайдах баарынан көрдөрөр «Саҥа күн кэтэһэр» пьесаны ситиһиилээхтик оонньоон көрдөрдүлэр. Пьесаҕа икки кэрэ аҥаар уонна эдэр киһи дьылҕалара көстөр. Кинилэртэн Жанна – аныгы үйэҕэ бары өттүнэн ситиһиилээх, дьулуурдаах, тулуурдаах, дьыалабыай хаачыстыбалардаах бизнес-леди. Онтон Катя 19 эрэ саастаах, олоҕу саҥа олорон эрэр туох да көмүскэлэ суох кыыс. Кинилэр иккиэн биир киһини, Андрейы, таптыыллар. Катяны Андрей көмүскүөн, араҥаччылыан баҕарар. Ол эрээри, орто дойду олоҕор баҕа санааҥ барыта туолбат, олох очурдара киһи буоларгын дуу, кии буоларгын дуу тургутан көрөллөр. Ким да, кими да аһыммат үйэтэ. Ол да иһин, олох охсууларыттан ким хайдах сатыырынан, баар кыаҕынан тахсарга дьулуһар. Эн баҕар кыай, баҕар хоттор. Ол эрэн, сарсын эйигин саҥа күн кэтэһэр.

 

Испэктээк тухары сырдык сцена, уот-күөс көстүбэтэҕин кэриэтэ. Оннук да буолуохтааҕа буолуо. Ыраас, чаҕылхай олох хайаларыгар да кэлэн биэрэр чинчитэ суох. Соҕотохсуйуу, хардата суох таптал, таҥнарыы… Сцена ортотугар аан турар. Аан икки өттүгэр икки киһи олоҕо тыктарыллар. Биирэ Жанна, биирэ Катя. Икки тус-туспа эйгэни ситимнии сатыыр ааны Андрей арыйар уонна сабар. Көрөөччү быһыытынан, бу көстүүнү режиссер булумньутунан сыаналаатым. Пьеса түмүгэ суох, аһаҕас хаалла. Сүрүн «пөрсонаж» – аан эмиэ аһаҕас хаалла. Ким да ааны аһан киирбэтэ да, тахсыбата да. Дьоруойдарбыт боруокка туран хааллылар…

nurba-2

Ньурба тыйаатырын сонун пьесатынан эҕэрдэлиэххэ эрэ сөп. Пьеса режиссера СӨ култуура туйгуна Розалия Тартакынова, сценаристАйыына Сергеева-Айыына Хаан, тылбаасчыт СӨ култуура туйгуна Мария Семенова. Жаннаны СӨ үтүөлээх артыыската Венера Никитина, Андрейы –Леонид Анисимов, Катяны Вера Лазареваоонньоотулар. Атын да уобарастары артыыстар, СӨ култуура туйгуннара Петр Винокуров, Надежда Афанасьева, Прокопий Федоров, Олег Конощукуонна Антонина Анисимова арыйдылар.

Манна сыһыаран эттэххэ, бу күннэргэ Эдэр көрөөччү тыйаатырыгар Ньурба тыйаатырын артыыстарын, испэктээкиллэрин көрө кэлбит дьон фойеҕа туруоруллубут хаартысканан быыстапканы сэҥээрэ көрүөхтэрэ.

Оставить комментарий

Войти с помощью: