Skip to content

АНОНС

Көтөрдөөх Өлөксөөндүрэ

        Бу  ааты мин була  сатаан ааттаабатым, айбыт айыылара,  ииппит иэйиэхситтэрэ илэ аҕалан көрдөрбүттэригэр,  иҥэрбиттэригэр  олоҕуран  ааттыыбын.  Канада биэс аҥаар мөлүйүөн нэhилиэнньэлээх Торонто куоратыгар, тыhыынчанан халлааҥҥа харбаспыт үрдүк  дьиэлэрин биирдэстэригэр, 25 этээскэ Александра Михайловна кыбартыыратын  болкуонугар 2014 сыллаахха  тохсунньу  бастакы күнүгэр кэлэн түспүт кыырт мохсоҕолу  мобильнай  тефонунан   бэйэтэ  устубут. Өндөл маҥан өксүөннээх халлаан өксөкүтүн удьуора, хаардаах, хаhыҥнаах  хоту халлаан  хотойун көрүҥэ, ким  кута-сүрэ сирдээн  бу манна тиийдэҕин, туох сибики илдьитэ буолан,  бу маны буллаҕыҥ  буолла? Түүллээхтэр түhээҥ, биттээхтэр билгэлээҥ, көрбүөччүлэр көрүүлэниҥ, таҥхаhыттар таайыҥ  эрэ!  

      Арай икки сүүсчэкэ сыллааҕыта хотугу  америка индеецтэрин босхолонуулаах хамсааhыннарын сатабыллаахтык  салайбыт  саха киhитэ,  күтүөттэрэ Боотур  ууhуттан  удьуордаах этэ. Кинини сатабыллаахтык саба түhүүлэри, тоҕоостоохтук  тоhуйууну, эккирэтиннэрэн  аҕалан  угаайыга  үктэнии курдук ньымаларын, сатабылларын иhин холуонньалааччылар сойуоласпыттара уонна аргынан албыннаан уохтаах утахтарынан угаайылаан  олохтоох киhини   кигэн сүhүрдэн өлөртөрбүттэрэ. Ол киhи барахсан өлөрүгэр кэриэhин оҕолоругар, сыдьааннарыгар маннык эппитэ үhү: «Хойутун хойут, кэнэҕэhин  кэнэҕэс кырыа хаар  үллүктээх, чэҥ муус түгэхтээх, чысхаан сытыы тыаллаах, тыйыс тымныы сиртэн дойдум дьоно кэллэхтэринэ күлбүн ол онно тириэрдэн ыhаарыҥ»- диэн эппитэ кэмэ кэлбитин кэрэhэлиирэ, түгэнэ тосхойбутун түстүүрэ эбитэ дуу?

       «Эбээн-саха төрүттээх Өлөксөөндүрэ буолабын»-диэн бэйэтин билсиhиннэрэрин, киэҥ эйгэлээҕин  Эбээн-Бытантай  улууhун олохтоохторо,  биир дойдулаахтара  Александра Михайловна  Григорьеваны  уруккутун, хойуккутун син билбэхтэhэн эрдэххит?  Ол даҕаны буоллар,  мин    эhиги истибэтэххититтэн,  көрбөтөххүтүттэн,  аахпатаххытыттан кыратык  сырдатыhыым.

        АХШ уонна аан дойду ис тас сыhыаннарын, эргийэр харчыларын, баайдарын-дуолларын   киининэн буолар Нью-Йорк куоратыгар Аан  дойду  иккис сэриитэ  түмүктэниэҕиттэн  ХНТ тэриллэн үлэлиир.  Биhиги Александрабыт  бу  манна  1998  сыллаахтан үлэлэhэр.  ХНТ иhинэн 2002 сыллаахха аан дойду төрүт  олохтоох  омуктарыгар диэн анаан  «Өрүүтүн үлэлиир»   тэрээhин олохтоммута уонна сыллата ыам ыйыгар иккилии нэдиэлэ устата үлэлээн ааhар форумнара олохсуйбута. Маны көҕүлээччилэриттэн, тэрийээччилэриттэн биирдэстэрэ эhиги биир дойдулааххыт,  киэн туттуугут  Александра Михайловна.  Бу маны  бастакы  уон сыл устата  дьүөгэтэ хотун  Элизабет Стаматополоу ситиhиилээхтик  салайан, иилээн-саҕалаан ааспыта.  Быйыл 2014 сылга 13 форум  ыытыллыахтаах.  Кини  манна хорутуулаахтык, таhаарыылаахтык үлэлиир туhуттан араас  омуктартан үгүс  элбэх доҕотторун түмэн «Юрта Мира» диэн аан дойду таhымынан үлэлиир бырааптаах  тэрилтэни тэринэн  үлэлиир.  Ол иhин  бу сылларга аҥардас саха сириттэн балтараа сүүсчэкэ киhи бу форумнар үлэлэригэр тиийэн кытынна.  Бу тухары биирбит даҕаны бэйэтин билиитинэн  «бэрдинэн» манна тиийбэтэҕэ, үлэлэспэтэҕэ, кини биhиэхэ барыбытыгар суолбутун солоото, аартыкпытын арыйда. Бу аан дойду биир даҕаны тойонуттан, хотунуттан,  тэрилтэлэриттэн,   миниистэрдэриттэн,  оннооҕор  судаарыстыбаларыттан  даҕаны   тутулуга суох буолар гына,  аан дойду таhымынан  үлэлиир  гына  анаан  тэриллибитэ уонна үлэлиир. Маны мин Аан дойду төрүт  олохтоох омуктарын  форумнарыгар  түөртэ кыттыбыппынан уонна үлэлэспиппинэн бигэргэтэбин. Онно тиийбит эрэ киhи, кырдьык даҕаны Александра Михайловнабыт  улуу бөhүлүөкпүт, Өксөкүлээх   Өлөксөйбүт,  кэлэр  көлүөнэлэригэр  анаан  алгыстаабытын  даҕаны,  оннооҕор  алҕаабытын   даҕаны аhары  түhэн  толорбутун өйдүүр. Кини  маны таhынан  хаста  даҕаны  ХНТ (ООН)   Генеральнай Ассамблейатын үлэтигэр кытынна.  Төрүт  олохтоох  омуктары  бырааптарын көмүскүүр,   олохторун  араңаччылыыр  аналлаах, уонча сылы быhа  үлэлэhэн   ылыныллыбыт   Төрүт сокуоннарын  24 ыстатыйатын  ааптарынан  буолар.   

      Төрүт олохтоох омуктар бырааптарын туhунан декларацияны 1993 сыллаахтан кэпсэтиигэ, ырытыыга  туруоран мөккүөргэ киллэрэн 2007 сыллаахха балаҕан ыйын 13 күнүгэр  ХНТ (ООН)  Генеральнай Ассамблейатыгар ылыммыттара.  Билиҥҥитэ бу сокуону 129 судаарыстыба билинэр. 4 судаарыстыба утарбыта уонна 11 судаарыстыба туттуммута.  Ол иhигэр киирсэр Россия, үөhээ этиллибит   судаарыстыбалар бу боппуруоска  көрүүлэрин уонна сыhыаннарын уларыталларыгар ыҥыран, биhиги баҕабытын биллэрэн, салайааччыбыт Александра Михайловна Григорьева форумҥа тыл этиитэ улахан өйөбүлү    ылбыта.       

          2012 сыллаахха А.М. Григорьева,  В.И. Дьяконова  уонна   мин, айымньылаах буоламмыт  Канада Виннипенг куоратыгар «Төрүт  олохтоох омуктар аан дойдутааҕы  спортивнай оонньууларын»  олохтуур быhаарыылаах мунньаҕар кыттаммыт сүргэбит көтөҕүллүбүтэ.  Бу маны буолар сирин быhаарыыга Монреаль, Оттава курдук улахан куораттар күөн көрсүhүүгэ кыттыбыттара.  Уиллис Литтлчайлд диэн посол тойон 370  мөллүйүөн  киhи өйөбүлүн хомуйбут бырайыага биhирэнэн кыайыылааҕынан буолбута.    Биhиги бу мунньахха «Мас реслинг» федерациябыт  статуhун үрдэтэр сыаллаах оҥорбут видеодискалары тиэрдибиппит уонна  бу спорт көрүҥэ салгыы сайдарыгар тэнийэригэр үлэлэhэргэ баҕабытын биллэрбиппит. Тэрээhин көрсүhүүлэр салгыы буолуохтаахтар. «Юрта мира» тэрилтэ «Төрүт олохтоох омуктар оҕолорун олимпийскай оонньууларын» олохтооhун, тэрийээhин, олоххо киллэрии биир сүрүн идеятынан буолар.

      Ити курдук хайҕаллаах үлэң хаҥаан истин, саргылаах соругуҥ суолталана суолланнын, ытыктабыллаах ыйынньыгыҥ ыпсарыллан ыырданнын! Алгыстаах аартыктан!  Тускулаах  туруктан!       

             «Возрождение планеты» международнай ассоциация норуот эмтээhинигэр     академига,       «Святой         Георгий» духовность   орденын кавалера уонна VI,  IX,  XI,  XII форум  кыттыылааҕа -“Эбээн Бытантай” кинигэттэн

 Степан Попов –Айыы Сиэн.

 

 

 

 

 

 

 

Оставить комментарий

Войти с помощью: