Skip to content

АНОНС

Көрдөстөххө күн көрөр, ааттастахха Аал хоҥнор

(Саха бөҕөһө Айаал Лазарев Олимпиада Бразилия  сиригэр үктэнэр бэлиэтэ бигэргэммитин туһунан кылгастык)

          10.10.2010 дьикти сыыппара туолар күнүн ханна баран бэлиэтээбит киһи дэһэн айылҕалаах дьоннору кытта куораппыт чугастааҕы мырааныгар тахсарга болдьоспуппут. “Алгыспыт туохха аналлаах буолара буолла, дьикти сыыппара тугу аҕалара буолла”- диэн хас биирдибит син саныы сырыттахпыт дии. Ол эрээри, ити күн тугу уунарын сэрэйбэккэ тиийбиппит. Ол  Алгыска Айыы Сиэн Айаал Лазарев – тустуугу илдьэ кэлбитэ. Эдэр бөҕөс норуот эмчиттэригэр эмиэ көрдөрөр эбит дуу дии санаабыттаахпын. Алгыспыт сиэрэ-туома саҕаланан барбыта.

          Айыы Сиэн Айаалы хайдах өйөөбүтүн туһунан кэпсээнэ: “2010 сыллаахха өрүүтүн олохсуйбут үгэс курдук балаҕан ыйын бүтэһик нэдиэлэтигэр тустууга улуу тренербыт Коркин Д.П кэриэһигэр аналлаах “Норуоттар икки ардыларынааҕы бирииһэ” күрэх ыытыллыбыта. Күүрээннээх күрэхтэһии ыарахан ыйааһыҥҥа 125 киилэҕэ дылы тустар уолбут Айаал Лазарев тобугун эчэйиитинэн, быраас быһаарыытынан хотторуубутунан түмүктэммитэ. Дьон уку-сакы дьиэлэригэр тарҕаһан бүппүттэрэ, көбүөргэ бастакы суһал көмөнү ылбыт тустуукпут Айаал уонна тус тренера Иван Николаевич Сивцев хаалбыттара. Мин соторутааҥҥа диэри тустуу кэмигэр кыһыйа-абара олорбут буоламмын, патриотическай тыыным, кутум-сүрүм уоскуйбакка норуот отоон эмчитин быһыытынан көмө оҥоро, Айаал эчэйбит тобугун тутааччы буоллум. “Өрүүтүн маннык буолааччы, хоттордубут, эчэйдибит, кыаттардыбыт даҕаны бэйэбит кыһалҕабытын кытары бэйэбит эрэ хаалааччыбыт”, – диэн улахан тренер Уйбаан Сивцев сонньуйбута. Айаал бу тобугун кириэстии тутар силгэтин үсүһүн эчэтиитэ эбит. Маннык оһоллоохтор тустууттан тута туорааччылар. Сахалар тустууга кыһыл көмүс мэтээл күлүмүн көрбөтөхпүт ыраатта. Арай бу, “сороковой роковой” тэтимэ аастаҕына эрэ билиэхтээхпит, көрүөхтээхпит диэн санааттан Айаалы хайаан да барыс диэн хаайан Алгыска тиийбиппит“ – диэн Айыы Сиэн кэпсээнин түмүктээбитэ.

        Ол улуу түгэҥҥэ мырааммыт үрдүгэр биэс уонча буолан ол иһигэр бэрт эрэйинэн мырааҥҥа тахсыбыт эчэйиилээх Айаалбыт уонна Канаадаттан биир дойдулаахпыт А.М. Григорьева баара мустубут бөлөхпүтүн сэргэхсиппиттэрэ. Сиэри-туому тумус туттар алгысчыппыт Артемььев А.С. – Кулан толоруута 10.10.2010 сарсыарда уон чаас уон мүнүүтэтигэр саҕаламмыта.

      Аар Айыылар, Сир Ийэ Иччитэ Аан Алахчын Өлбөөдүйбэт Өбүгэлэр ылыннахтарына хайаан даҕаны бэлиэ биэриэхтээхтэр диэн кэтэспиппит көһүттэрбэтэҕэ. Ып – ыраас күөх халлааҥҥа, хайабыт даҕаны үйэбит тухары харахтаабатах, көрбөтөх улахан муус маҥан көтөрбүт кэлэн ааспыта. Мин бэлэм фотоаппараттаах буоламмын таба тутан түһэрэн хаалбытым. Ол маҥан көтөрү (Зимняк, размах крыльев до 2 м.-сахалыыта кыстыыр кыырт). Онно тута көрбүөччүбүт (И.Ж.) Айаал Лазаревы Олимпиада бэлиэтэ, алгыс тиийдэ диэн эҕэрдэлээбитэ. Бэлиэ олоххо киирэрин лоп курдук алта сыл кэтэстибит. Рио куоракка Айаал Лазарев Олимпиадаҕа кыттыытын ис турукпутунан кэтээн көрөргө бэлэмнэнэбит. Сахалар Олимпиадаҕа тиийбит уолаттарбытын дойдубутуттан өйөөн Алгыспытын ыытыаҕыҥ! Алгыс Аан Айыы Ата арчылаатаҕын буолуохтун Саха бөҕөстөрүн. Дом! Дом! Дом!              (Чопчуйаана)

IMG-20160816-WA0003

12930839_464628953661930_1558402542_n

Үрдүк айыыларбыт

Анаабыттара арчылаах буоллун!

Санаабыттара саргынан сыдьаайдын!

Тосхойбуттара толору дьолунан таһымнаатын!

(Айыы Сиэн)

                                                         

Эдэр бөҕөстөргө ватсап киэҥ эйгэтиттэн Алгыстар

Аламай Күнү көрсө!

Аламаҕай санаалаах,

Тобуллаҕас толкуйдаах,

Киэҥ киэлиилээх,

Уһуну-киэни анаарар

Сахабыт дьоно-сэргэтэ!

Олус өрүкүнэйбэккэ,

Салгыны хамсаппакка,

Дирбиэни – дарбааны таһарбаакка,

Саха сайаҕас санаатынан,

Сэмэй сиэринэн чуумпутук,

Уу нураллык,

Үрдүк сыанабылы,

Эрэли, итэҕэли ылан,

Дойдуларын аатын

Көмүскүү барбыт

Саха бастыҥнарыгар

Үрдүк үөрүүбүтүн,

Бигэ эрэлбитин,

Барҕа баҕабытын,

Аман алгыспытын,

Бука бары

Санаабытын холбоон.

Күүспүтүн түмэн

Тиэртэхпит буолуохтун!

Тапталлаах сахаларын

Сирин ситэн-тупсан

Силигилээн

Айыылар күүстэрин

Саамай муҥутуурдук

Ылынан турар.

Аар айылҕабыт барахсан

Күүһүн-күүдэҕин

Оҕолоругар туһаайан

Күүстээх сүрүгэр оҕустаран

Күүстэригэр күүс эбэн,

Айыыһыттара аргыстаһан,

Иэйэхситтэрэ ийэ хотун

Түөрт өттүлэриттэн

Көмүскээн-арчылаан

Саха Таҥарата

Дьөһөгөй Айыы

Тулуурун тутуһан,

Дьүккүөрүн ылынан,

Хомпоруун Хотой айыы

Сытыы хараҕын,

Сылыбырҕа санаатын,

Сымса хамсаныытын,

Хоһуунун холбоон.

Аан Дьааһын айыы

Кырдьык кылбатан,

Арҕаһыттан тэһииннээх

Айыы дьонун,

Айыы санаалара тиийэн

Көхсүттэн көнтөстөөх

Күн дьонун,

Күргүөмнээх санаалара күүркэтэн,

Оҕолорбут барахсаттар,

Үрэллибэт үрүт күүстэнэн,

Алларыйбат алын күүстэнэн,

Өттүктээхтэн өҕүллүбэккэ,

Сүһүөхтээхтэн бүдүрүйбэккэ,

Сылайбат сындааһыннанан,

Быстыбат бырдыыланан,

Эстибэт эрчимнэнэн,

Тыыҥҥыт уһаан,

Көхсүгүт кэҥээн,

Сүргэҕит үрдээн,

Кыайыы-хотуу кынаттанан,

Өрөгөй-талаан көтөллөнөн,

Үөрүү-көтүү үктэллэнэн,

Дойдугутугар эргиллиннэххит

Саха саарынын

албан аатын аатырыаххыт,

Урааҥхай туйгунун

үрдүк аатын

үрдэттэххит буолуохтун!

Уруйбутун ууннахпыт,

Саргыбытын салайдахпыт,

Тускубутун туһаайдахпыт,

Алгыспытын анаатахпыт буолуохтун!!!

Оннук эрэ буоллун!

Алгыс баһа сыаланнын!!!

Уруй-туску! Айхал-мичил!!

Тускуо! Тускуо! Тускуо!

Сыдьаайа уонна Байдам  алгыстара

                                                             06.08.2016

Оставить комментарий

Войти с помощью: