Skip to content

АНОНС

Өрөспүүбүлүкэҕэ маҥнайгытын Нам улууһун Партизан нэһилиэгэр «Хотуур ыһыаҕа» ыытылынна

ыьыах хотуур2016_07_20-20_35_38

Нам улууһун Партизан нэһилиэгэр баар лааҕыр базатыгар «Хотуур ыһыаҕа» ыһылынна. Сүрүн көҕүлээччинэн Намнааҕы история уонна этнография түмэлэ, улуустааҕы тыа хаһаайыстыбатын уонна культура Управлениелара, Партизан нэһилиэгин дьаһалтата буоллулар. Манна республикаҕа аан бастакытын саха хотуурунан оту охсууга күрэхтэстилэр.
Иторияҕа тиһиллэр тэрээһин иннинэ Нам улууһун аатырбыт тимир уустара маҥнай кирпииччэни туойунан сыбахтаан, оһох чочуйан таһаардылар. Итиэннэ Үөдэй нэһилиэгиттэн 10 киилэ ыйааһыннаах тимир рудатын булан аҕаланнар, уһун сыралаах күнү быһа уулларан, уһааран, таптайан, түмүккэ саха хотуурун таһаардылар.
Биир сонун тэрээһининэн өбүгэлэрбит сиэрдэринэн-туомнарынан күүлэйгэ анаммыт сүөһүнү астааһын буолла. Оттон ураты от охсуутун күрэҕэр уопсайа 5 кыттааччы күрэхтэстэ. Быраабыла быһыытынан, хас биирдии киһиттэн былыр үйэтээҕи быһыылаах хотуур, маны тэҥэ сахалыы үлэҕэ кэтиллэр таҥас ирдэннэ. Тиритиилээх-хорутуулаах күөн көрсүүгэ дьүүллүүр сүбэ охсооччу охсубут иэнин, хаачыстыбатын, түргэнин көрөн сыаналаата. Түмүккэ кыайыылаахтар сибиэһэй сүөһү этин миэстэтигэр үллэһиннилэр.
Республикаҕа маннык тэрээһин маҥнайгытын ыытыллар. Онон тэрийээччилэр: «Өбүгэлэрбит үтүө культураларын үйэтитэр тэрээһин Саха сирин үрдүнэн киэҥник тарҕаныа», – диэн санааларын үллэстэллэр. Бэлиэтээн эттэххэ, инникитин Намнааҕы история уонна этнография музейын тустаах үлэһиттэрэ сахалар от охсууларын туһунан историческэй киинэ оҥорон таһаарыахтара.

Төрдө:

НВК Саха

Оставить комментарий

Войти с помощью: