Skip to content

АНОНС

Открылся канал нашего портала в Ютубе - Канал «Якутия. Образ будущего»

Айыы Хаан Таҥара

                             Чаҕаан

Төрүт буор сүтүөҕэ 
Ийэ сир иннэстиэ 
Сараһын сабардыа
Элиэһэй элбиллиэ

Айыыны хараны
Барытын умнаммын 
Сахалыы тылбытын
Саҥарбат буоллахха

Ислам Христос 
Иннигэр үҥтэххэ 
Таҥара кыраабыт
Омуга аатырыам

Атыҥы батыһар
Айыыны хаалларар 
Төрүттэн кыбыстар
Күннэрим үүнүөҕэ

Таҥара баарына
Айыыбыт тыыннааҕар
Сахалыы саҥабын
Умнубат инибин

Сараһын айаҕар
Элиэһэй ииригэр
Иннибит биэрбэккэ
Эрийсэр инибин

Ырайга тиийээри 
Атыҥы сутуйар
Алыптаах тылларга 
Ылларбат инибин

Төлкөбүн түстэппит
Төрөөбүт буорбутун 
Тэскилээн күрэнэн 
Таннарбат инибин

Үрүҥ күн сарыала 
Сырдыгын тухары 
Айыы Хаан Таҥара 
Арчылыы туруоҕа

Бу ыраас халлаантан 
Олохтоох дойдуттан 
Олорор олохтон 
Ордук диэн сымыйа

Үрүҥ күн сырдыгын 
Ким сирэр утаран 
Баҕалаах ырайгар
Бу сиртэн тэскилээ 
              

   *

Бүтүн Россия аатыттан

Биһи Ньургун Боотурбут

Балтикаҕа Прибалттарга

Былыргы дойду күрэҕэр

Бары бэппин дэммиттэри

Бухатыырдыы санаммыттары

Бастыҥ бөҕөстүү туттубут

Былыргы дойду эрэллэрин

Барыларын үҥкүрүтэн

Бүлгүрүтэн сууллартаан

Бобо тутан баттаталаан

Быраҕаттаан көрдөр эрэ

Биллинэр хоту дойдуну

Боотур ханна ууһулларын

Биһигиттэн күн тахсарын

Бухатыыр манна төрүүрүн

Биһиги бигэ эрэлбит

Биһиги бастыҥ бөҕөспүт

Биһиги хотугу хоодуоппут

Биһи Ньургун Боотурбут

   *

Сымыйа сутунан бар дьону балыйан

Атыыны эргиэни барытын тохтотон

Бар дьону барытын күүһүнэн күһэйэн

Балыйан албыннаан сириттэн үүрбүттэр

Татаардар Ингуштар Чеченнар кэптэрин

Биһиэхэ кэтэрдэн тус хоту кыйдааннар

Дойдубун кураанах дьоно суох хаалларан

Иччитэх өтөхтөр сирдэрэ буолбуттар

Айыыны хараны оҥорбот баҕаттан

Атын дьон өтөҕөр саараабат буоламмыт

Аныгы ыйаахха ымсыылаах дьоннорго

Айдааннаах аймахха куоттарыах курдукпут

Алдьархай буолаарай абааһы аймахтыын

Алаастыы кыттыһан  ыаллаһар буоллахха

Адьарай ааттаҕа айдаана баһаама

Архааҥҥы аймаҕын сыдьаанын ыҥыран

Айыыбыт сириттэн төрөөбүт алаастан

Аргыыйдык ыктаран ытырсан дайбаһан

Айдаарсан этиһэн дойдуттан үүрүллэр

Арахсар күннэрбит саҥаттан үүнээрэй

Үрдүкү айыылар үөһээҥҥи тойоттор

Айыы хаан аймаҕын эһиги харыстаан

Айыыбыт харабыт баһаамын да иһин

Абааһы айаҕар саҥаттаан ыытыман

 *

Үөһээ үрдүк сололоохтор

Үрдээбитэ аатыраннар

Төрүкү тылы киртитэннэр

Тыбыыраллар тыыналлар

Саха тыла таҥараттан

Якут тыла адьарайтан

Тылбыт ыраас буоларын

Туруулаһан тулуйуоҕун

Арбаҕастаах албыныттан

Айыы тылын харыстыаҕын

Айыллыбыт тылбытын

Абааһыга сиэтимиэҕин

Киирии тыллаах киэптээбэтин

Кэлии тыллаах киэбирбэтин

Кэскил тылын кэдэритэн

Кэрэ тылы киттиппэтин

Солотуттан суулларыаҕын

Олбоҕуттан охторуоҕун

Үктэлиттэн түҥнэрэн

Үлэтиттэн көтүтүөҕүн

Уонна хайдах тылбытын

Сахабытын харыстыыбыт

Атын тахсар аартыгы

Ыйан биэрэр ким баарый

 

  Гагарин хасыһый

Халлааҥҥа дьиҥ чахчы

Бастакы ким буолла

Суорума суолламмыт

Сураҕа суох сүппүт

Гагарин иннинэ

Хас киһи көппүтэ

Чахчыта биллибэт

Кырдьыга кистэлэҥ

Гагарин бастакы

Тыыннаахтыы эргийбит

Сир ийэ бастыҥа

Орто сир улуута

Ол эрэн сороҕор

Саарбахтыах курдукпун

Куйаарга тахсааччы

Бастакы кини дуо

Оннооҕор Христос

Өлүгэ кытары

Кылбайар халлааҥҥа

Күөрэйбит ааттааҕа

Кытайтан биир улуу

Былыргы баһылык

Бурҕайар буруолаах

Олоппос оҥостон

Быраман ыраахха

Биллибэт дойдуга

Барбытын биһиэхэ

Билигин кэпсииллэр

Дьүраа маҥан халлааҥҥа

Дьураатыгар төрөөбүт

Дьулусханныы субуллар

Дьоруо хара атынан

Орто дойду дуолана

Олоҥхо Ньургуна

Үөһээҥҥи халлааны

Үрдүнэн көтөрө

Биир куйаар иһигэр

Биир өрүү халлааҥҥа

Хас улуус хас дойду

Төһөтө биллибэт

Бары да үөһэттэн

Бу орто дойдуга

Айаары тутаары

Айыллан кэллэхпит

Халлаантан кэлээччи

Халлааҥҥа таласпыт

Дьиҥ чахчы ахсаанын

Ким билиэй төһөтүн

                          

 

Оставить комментарий

Войти с помощью: