Skip to content

АНОНС

Открылся канал нашего портала в Ютубе - Канал «Якутия. Образ будущего»

Чаҕаан

Кыһыл сэрии күнүнэн

Сэбиэскэй кэм симэлийбитэ

Сэбилэниитэ сүппүтэ

Арҕам тарҕам ыһыллан

Бэйэ бэйэтиниин кыргыһар

Аны билигин Россия

Атын таннар таҥастаах

Атын былаах аннынан

Атын тыыннаах сэриилээх

Ол да буоллар сэбиэскэй

Албан аата ахтыллар

Хорсун хоодуот буойуттар

Кыайыылара ылланар

             *                  

Артилерис  Протодьяконов

Кырыктаах кыргыска

Уоттаах сэриигэ

Төрүү илик оҕотун

Төлкөтүн туһугар

Сытыы батас кылыстанан

Туруммута Бырдьыкаанап

Өстөөҕү  өһөрөн

Бардамы баһыйан

Кыайыы хотуу кынаттанан

Герой аатын өрө сүгэн

Төрүүр оҕотун төлкөкөлүү

Төннүбүтэ Бырдьыкаанап

Хайалара баһыйыай

Маннык ааттаах баатыры

Холуннарыа хотутуо

Маннык хорсун хоодуоту

Баара суоҕа баһылык

Кыра нэһилиэк тойоно

Бэйэбитин харыстаспат

Ахсааннаах да эрээри

Кыра хара баһылык

Кыайбатах кыһыытын

Таһаардаҕа толору

Бырдьыкаанап үрдүнэн

Тойонунан оонньоомон

Оттон мастан тахсыбат

Ситиһиилээҕи кыайыылааҕы

Дьаһыйаары айыллар

Бэйэтэ бэрдин биллэрээри

Туһаннаҕа түгэн тутан

                *             

Кыһыл сэрии күнүнэн

Кыайыылаах кыһыл сэриинэн

Кэрэ бэлиэ күнүнэн

Күн сиригэр күөрэйбитинэн

Күүһүн уоҕун көрдөрбүтүнэн

Эрдэтээнҥи ыччаттары

Эрэт буолбут күннэринэн

Эрдээх санааны ылбыттарынан

Эрчимнээхтик сылдьыбыттарынан

Аҕа дойдуну көмүскээн

Аан дойдуну абыраан

Айыы дьонун араҥаччылаан

Аламай күнү арчылаан

Кэлиҥ кэрдиис кэмнэргэ

Күүһүн уоҕун сүтэрбэккэ

Кыаттарбакка даҕаны

Кэхтибитин да иһин

Килбиэннээхтик сылдыбыт

Кыргыһыыны кыайбыт

Кыһыл сэрии кыттыылаахтарын

Кэлбит күнүнэн эҕэрдэ

                      *                   

Билиҥҥи сэрии боотура

Билиҥҥи сэрии боотура

Бастыҥ бэргэн ытааччы

Барыларын суулларар

Батарыта ытыалыыр

Туспа омук сэриитигэр

Тоҕо эмиэ ороосто

Туох буруйдаах өстөөҕү

Тоҕо өлөрө сатаата

Кыргыстынар бэйэлэрэ

Кыдьыктарын таһааран

Кыһалҕаҕа ылыныма

Кыра омук киһитэ

Бэйэбитин элбэттэрбит

Бэйэ дьиэтин тэрийдэрбит

Баһаам оҕону төрөтөн

Бастыҥ аҕа аатырдарбыт

Мирон тыыннаах эргиллэн

Манна дьиэҕэр кэлэҥҥин

Мантан олох тэринэн

Мирон аҕаа дэттэргин

                *              

Хоту дойду Хоһууна

Хоту дойду Хоһууна,

Хорсуна, хоодуота,

Урааҥхай удьуора-

Саха боотура!

Иэдээн ирдээтэҕинэ ,

Алдьархай ааннаатаҕына,

Кырыктаах кыһайдаҕына,

Үлүгэр үксээтэҕинэ!

Илбис ииригирдэҕинэ,

Адьарай айбардаатаҕына,

Баламат бардамнаатаҕына,

Соххор содуомнаатаҕына!

Саргы дьаалы салалларыгар

Сааланан-саадахтанан,

Ил эйэ эҥэрдэһэригэр

Сытыы батас кылыстанан

Айыы Хаан аймаҕын абырыы,

Күн улууһун оҕотун көмүскүү,

Өстөөҕү өһөрө, бардамы баһыйа,

Кыргыһыан инниттэн

Бар дьон баатара

Барыбыт хаххата,

Буойун бэрдэ,

Бухатыыр үтүөтэ,

Сэрииһит ааттааҕа,

Саллаат сааталлааҕа,

Саабыла кымньыылааҕа

Буола үүнэргэ

Барыны баһылыхтаах!

Баһаамы билиэхтээх!

Үгүһү өйдүөхтээх!

Үөрэхтээх буолуохтаах!

               *             

Ыҥырыктаах ыар сүтүк

Бүгүн һахаҕа кутурҕан

Ыҥырыктаах ыарахан

Илиҥ сибиир сэриитин

Толук ыыппыт күннэрэ

Кыайар баҕа санааттан

Өстөөҕү өйүн буккуйан

Ураанхай эдэр удьуорун

Ууга уокка укпуттара

Старай руссо куоракка

Ильмен улуу күөлүгэр

Уон тохсус ханыһардаах

Бригада диэн ааттааннар

Айыы хаан аймахтарын

Алта сүүсчэкэ саханы

Сүүрбэччэлээх ыччаттары

Ыраас мууска аспыттара

Саһар куотар сирэ суох

Бомба снаряд  дэлби тэбэр

Турар муустара хайа баран

Бары онно симэлийбиттэрэ

Бүгүн үөрүү буолбатах

Кыһыл аармия аны суох

Бүгүн улуу кутурҕан

Ыҥырыктаах ыар сүтүк

    *        

 Сотору сарыалбыт сандаарыа 

Саҕахпыт тулатын сырдатыа,
Сотору сырдык күн кыырпаҕа
Сайыҥҥы сылааһы сыдьаайыа.

Сотору күн уһаан, сылыйан
Сир дойду хараарыа, хаар ууллуо,
Сотору саас кэлэн сир тиллэн
Сааскы ыам түбүгэ үксүөҕэ.

Сотору хонууга, сыһыыга
Сүүрүкпүт куугунуу устуоҕа,
Сотору симэх от ситиэҕэ
Сыыр ахсын ньургуһун тыыллыаҕа.

Сотору айылҕа уһуктан
Салгыны дыргыл сыт тунуйуо,
Сотору сир, тиллэн муус ууллан
Сааскы булт түбүгэ элбиэҕэ.

Сотору дьүөрэлии ыччаттар
Сааскы кэм угуйар күүһүнэн,
Сир дойду тиллэрин туоһулаан 
Сиэттиһэн түүннэри  хаамсыаҕа.
                                 

Оставить комментарий

Войти с помощью: