Алампа убайбыт
Кэлэр кэмнэри кэрэһэлээри,
Үүнэр үйэлэри үйэтитээри,
Аньыылаах-харалаах
Аҕыс уонча сыллары аһараҥҥын,
Сэттээх-сэмэлээх
Сэттэ уон сэттэ сыл
Силбигэр, силлиэтигэр симэлийбэккэ,
Сибэтиэй сэбэрэҕин сүтэрбэккэ,
Кур бэйэҕин кубулуппакка,
Ытык эккин-сииҥҥин ыһыктыбакка,
Бүтүн көлүөнэҕиттэн бүтэһигинэн
Көстөр дьүһүҥҥүн кытары
Көрдөрөн аастаҕыҥ.
Саамай ахтар-саныыр,
Саатар биирдэ
Түөс туоларынан
Толору тыыммыт киһи диэн,
Суохтаабыт дойдуҥ
Мүөттээх салгыныгар
Сайа оҕустаран,
Сиккиэр тыалыгар сипситтэрэн
Уоскуйдаҕыҥ буолуохтун!
Аһаҕас эттээх,
Көрбүөччү харахтаах дьонуҥ
Сириҥ-дойдуҥ иччилэрэ
Куттуун-сүрдүүн
Үөрбүттэрин иһиттилэр,
Көһүппүттэрин көрдүлэр,
Билбэтэхтэрин биллилэр эбээт!
Бэйэҥ бэлиэтээбиккинии,
«Иин түгэҕэр иһийэн сытар киһи курдук» диэбит
Ийэ сириҥ ыччаттара,
Боотур ууһун удьуордара
Тумус туттар дьоннордоох
Инники күөҥҥэ сылдьалларын,
Илэ бэйэҥ куттаргынан
Бүгүн билэн аастаҕыҥ,
Өр даҕаны кэтэстэҕиҥ.
Арай, эмиэ соһуйдаҕыҥ
Оҕо сааскын санатан,
Үрдүк дьиэҕэ үҥүлүппүттэриттэн,
Атын тыллаах
Аҕабыыттар атаарсыбыттарыттан.
Алампа – ытык киһибит,
Уһун уугунан
Уоскуйа быһыытыйан,
Саҥа киһи буолан
Айдарыылаах кут – оҕо
Кэлэргин кэтэһэбит.
Кистэлэҥ күүс. – 2012. – 5№
