Skip to content

АНОНС

Открылся канал нашего портала в Ютубе - Канал «Якутия. Образ будущего»

Алмаасчыт сахаларга сырыттым /Суоллааҕы бэлиэтээһиннэр/ 6 часть.

скачанные файлы (2)

От редакции: мы завершаем публикацию серии путевых заметок известного якутского государственного деятеля, публициста и писателя Д.Ф.Наумова о впечатлениях от посещения им подразделений компании «Алмазы Анабара» летом 2015 г.

Миитэрэй Наумов

23.06.2015

Халлаан үчүгэй. Петров Валерканы көрсөн уларсыбыт телефоммун биэрдим. Аһаан бүтэн иһэн Дорофеев Алешаны, балтым Мариас кэргэнин көрүстүм. Үчүгэйдик сылдьар эбит. Андрейдыын быраһаайдастым. Бүгүн мантан 7 киһи барар үһү. Олору кытта Сааскылаахха тириэрдэллэрэ буолуо. Анаабыр өрүс устун 4ч. устан Сааскылаах бөһүөлэгэр кэллибит. Аара устан иһэн аатырар Эбэ хайаны көрдүбүт. Сүдү көстүүлээх барахсан эбит. £рүс уута элбэх.

Арьянов Владимир Алексеевичтыын түүн 12ч. диэри былыргы совхозпут олоҕун кэпсэттибит. Жирков Николай диэн Бүлүү бааһынайа сварщиктар механиктара уолу күнү быһа «үөрэттибит», эдэр сааспыт кэрэ кэмин ахтан кэпсэттибит.

Түүн 3ч. ааһыыта уһуктан баран аанньа утуйбатым. Сарсыарда уолум Дима табаарыһын Архайы кытта кэпсэттим. Дима эҕэрдэ ыыппытын тириэртим.

Ол күн Якутскайга көттүм. Самолекка толору вахтаттан тахсан иһэбит дэһэр уолаттары кытта айаннаатым. Үксэ белазистар, бульдозеристар эбит. Кинилэри солбуйар дьону биһиги көтөн иһэр самолеппут аҕалбыт. Үлэлээн-хамсаан, үп-харчы аахсан иһэр, табыллыбыт сырыылаах дьон быһыытынан үөрбүт-көппүт сирэйдээхтэр-харахтаахтар.

Үнүр кадровигы кытта кэпсэтэрбэр, үлэһиттэрбит 93%-нара улуустан сылдьар тыа уолаттара диэбитэ санаабыттан арахпат. Комбинаппытыгар үөрэнэн аныгы промышленность техникатын баһылаан үлэлии сылдьаллар, сылтан сыл үүнэн-сайдан иһэллэр диэбитэ. Ол аата ити бириискэҕэ үлэлээн өлөрүллэр харчы 93% тыа сиригэр, дэриэбинэҕэ тиийэр буоллаҕа. Мин ыалым Вася Лазарев курдук. Үөрэ санаатым. Олох, кэм-кэрдии уларыйыытын тыына илгийэр, олохпут бу саҥа сонунуттан.

Аҕыс уонус сыллар бүтүүлэригэр биһиги Исидор Барахов аатынан совхозпут Бүлүү Гэһин кытта шефтэһэр этэ.£рүү ыалдьыттаһарбыт. ГЭС-тэр биһиги үлэбитигэр-хамнаспытыгар көмөлөһөллөрө. Саха саарынын, киһи бэрдин Прокопий Осиповы онно билсибитим. Үлэлии, көмөлөһө кэлбит дьону салайан биһиэхэ кэлэрэ.

Гарри Николаевич Черкашин диэн директор үлэлээн сылдьыбыта. Бэрт мааны, дьоһуннаах киһи этэ. Биирдэ совхоһум дьонун илдьэ бара сылдьыбытым. Биһигиттэн ынах сүөһү, биир ат ылбыттара, ону олохтоһо уонна дуогабарбытын салгыы үлэлэһэр наадалаах тиийбиппит.

Мин Гарри Николаевичтан бачча кэлбит дьону алмааһы көрдөр, алмаасчыттары кытта кэпсэт диэбитим. Киһим:

– Эн дьоҥҥун ааспыт сырыыга илдьэ сылдьыбытым ээ. Омук делегацията кэлбитин кытта хоһулаһан киирбиппит. Пискунов хоһугар биир көстүрүүлэ алмааһы остуолга тэлгэтиллибит баархакка куппуттара. Элбэх алмаас этэ. Эн дьонуҥ ол алмаастартан илиилэригэр ылан эргичиҥнэтэн баран, сөбүлээбэтэхтэрэ сирэйдэриттэн-хархтарыттан олох көстөрө, алмаастарын остуолга төттөрү бырахпыттара уонна баран олорунан кэбиспиттэрэ. Туох диэн кэпсэтэллэрий диэн сахалыы билэр киһиттэн ыйыппыппар. «Пахай, олох күлүмүрдээбэт, боростуой түннүк тааһын курдук эбит буолбаат, тугу кэпсиир баҕайыларый» – дэспиттэр уонна атыны кэпсэтэн барбыттар, олох да долгуйбаттар этэ. Онтон омуктар алмаас элбэҕиттэн сөҕөн илиилэрэ салҕаластыы, сорохтор көлөһүннэрин сотто-сотто көрбүттэрэ. Эһиги, сахалар алмааһы өйдөөбөккүт, – диэбитэ. Мин олус кыһыйа санаабытым. Мин да син биир оннук саныам этэ диэн санаабыппыттан соһуйбутум.

Бу Анаабырга бара сылдьыыбыттан илдьэ кэлбит санаам үөрүү, өрө көтөҕүллүү аргыстаах буолла. Санаам аргымтата гыммыт таһаҕаспын көҕүрэтистэ. Эдэр эрдэхпиттэн бииргэ үлэлээбит икки хараҥаны ыпсарар үлэлээх совхоһум дьонун ахтан-санаан ыллым. Ол дьонум оҕолоро, алмаас күндүтүн санаан санаалара тиийбэт тыа сахаларын уолаттара, билигин алмаас хостоон, бүтүн бириискэни баһылаан үлэлээн тигинэтэ сылдьалларын уу харахпынан көрөр, кэпсээннэрин эт кулгаахпынан истэр, онтон сүрэхтиин сылаанньыйа үөрэр күннээх эбиппин. Тыа дьоно уларыйбыт, олоҕу кытта тэҥҥэ хаамсар киэҥ олуктаммыт эбиттэр, онно чиҥ тирэх үөскүүр суола аһыллыбыт эбит.

Мин төрүөхпүттэн ынах-сылгы аргыстаах, от-бурдук хомуура толкуйдаах тыа сирин сааһырбыт сахата барыта тыа сирин уолаттара тэрийбит, тус бэйэлэрин, бииргэ үлэлиир дьоннорун киһилии сэбэрэлэрин, өйдөрүн-санааларын дириҥник ытыгылаан оҥоһуллубут, тэриллибит, эр киһи ыарахан үлэтин кыайа-хото тутар, онтон киэҥ туттар сиригэр сырыттым ээ. Тыа сахатын олоҕо барар сирэ баҕана үүтэ, кэлэр сирэ кэлии үүтэ буолбатах эбит. Дойдутугар да олорон олоҕун сиэрин, тутулун алдьаппака эрэ «Анаабыр алмаастара» тэрийэр вахталарын курдукка үлэлээн-хамсаан үп-харчы өлөрөн, олоҕун тупсарыныан сөп эбит ээ дии санаатым.

Алмаасчыт сахаларга сырыттым, үөрэ, сөҕө, киэн тутта!

images (2)

images

 

Оставить комментарий

Войти с помощью: