Skip to content

АНОНС

Открылся канал нашего портала в Ютубе - Канал «Якутия. Образ будущего»

Алмаасчыт сахаларга сырыттым /Суоллааҕы бэлиэтээһиннэр/ 5 часть.

 

 

 

От редакции: мы продолжаем публикацию серии путевых заметок известного якутского государственного деятеля, публициста и писателя Д.Ф.Наумова о впечатлениях от посещения им подразделений компании «Алмазы Анабара» летом 2015 г.

Миитэрэй Наумов

22.06.2015

Сарсыарда алта саҕана турдум. Халлаан тыала суох, көтөҕүллүбүт, быһытталаммыт былыттаах.

Остолобуойга бэҕэһээ кэпсэппит Уххан табаарыһыгар икки кинигэни, дискэбин биэрдим. Остуолга Горнай, Чурапчы саастаах соҕус дьонун кытта олорон аһаатым. Горнайдар элбэхпит дэһэллэр, көрсүбүт Горнайтан сылдьар уолаттарым «Анаабыр Алмаастарыгар» үлэлииллэрин сөбүлээбиттэрин, үлэлии кэлбит дьон быһыытынан үлэ тэрээһиниттэн, темпэтиттэн астыналларын кэпсииллэр. Бүгүн Сааскылаахха барабын. Туох быһаарыы тахсарын кэтэһэ олорон суруйдум.

Быһаарыы Сааскылаахха барбаккын диэн буолла. Воздушнай подушка кыайан оҥоһуллубатах. Онон Эбэлээх диэн подушканан Шамаев М.Э. хас да киһини, ол иһигэр тутууну салайар Игнатьев Михаил Николаевиһы илдьэ саҥа тутуллар Талахтаахха барар буоллубут. Бэҕэһээ барбатахпыттан хомойбутум, онон барыстым. Эбэлээххэ Анаабыр өрүс биэрэгэр причалга тиийдибит. Алдьаммыт подушка туохтан сатаммакка турарын кыайан быһаарбакка турар. Биир подушкалара Үрүҥ Хайаҕа долгуҥҥа хаайтаран олорор үһү. Онон биһиги «Эбэлээх» диэн Анаабыртан үлэлээн кэлбит подушканан Анаабыр өрүһү өрө устан Талахтаах диэки бардыбыт. Анаабырга Улахан уонна Кыра Куонапкалар улахан таас очуоһунан быысаһан холбоһор сирдэриттэн ыла Анаабыр өрүс дэнэр эбит. Онон хотугу биир Эбэ саҕаланар сиригэр сырыттым диибин. Олус кэрэ көстүүлээх дойду эбит. Биһиги Улахан Куонапканы батан 2 ч. 30 м. айаннаан Талахтаах үрэҕин төрдүгэр тиийдибит. Онно Максим Николаевич Казаченко диэн арааһа сэттэ бууттаах Кангаласс нууччата көрүстэ. Техучаастак начальнига эбит. Сабыс саҥа МХМ-нан тутуллубут остолобуойга аһаатыбыт. Дьонум сортировочнай комплекстарыгар бардылар. Мин саҥа бөһүөлэк тутууларын көрдүм. Эбэлээхтэн 3 финскэй дьиэни көһөрөн аҕалбыттар. Биир бүтэн, уота тардылла сылдьар. Биири балтараа ый иһигэр тутан көҥдөйүн бүтэрэн, хосторун оҥоро сылдьаллар. Биири, быйыл саас аҕалбыттарын каркаһын туруора, алын этээс плиталарын кранынан уура сылдьаллар. Төһө да көтүрүллэн аҕалылыннар бэрт судургу тутуулаах дьиэ эбит. Түөрт сүүс киһи олоруо үһү. Хонтуора дьиэтин МХМ панелларынан уон хонук иһигэр тутан сарайын саба сылдьаллар. Бэртээхэй баанньык туппуттара үлэлии турар. Гараж, мастерской уонна улахан бэйэлээх фабрика көҥдөйдөрүн каркаһа турбут. Билигин үлэһиттэр олорор вагоннарын быыһыгар 2 эбэҥкилии (табаһыттардыы) тутуллубут балаакка, 4-5 үүтээн курдук тутуулаах урут манна үлэлээбит дьон тутуулара самнаһан тураллар. Ааспыт олох курдук диэн санаа киирэн ылла.

Тутуу бөҕө. Икки сыл буолан баран кэлэн көрбүт киһи, төһөлөөх үчүгэй дэриэбинэ буолуох эбитэ буолла. Барыта үлэлиир дьон туһугар, барыта куораттыы типтээх. Барытын саха уолаттара тута сылдьаллар.

– Манна атын омугу банаардаах да булар уустук – диир прорабтара.

Куонаапкалар төрдүлэригэр диэри күүстээх ардах ортотугар айаннаабыппыт. Кэлэн истэхпитинэ үрүйэлэр уулара эбиллибит аҕай. Халлаан сылыйда, тыал тохтоото, былыт көтөҕүллүөх курдук.

£лөөн диэки баран истэх аайы мастара арыый үрдээн иһэр. Хонууга киин улуустарга үүнэр сибэккилэр үүнэн тураллар. Сылгы чыычааҕа бөҕө. Талахтаахтан Дьэлиҥдэ 70-тан тахса километр үһү.

«Белаһы» ремоннуур Алтайтан сылдьар моторист нуучча кэлистэ. Үһүс сылбын сылдьабын, хоту сир тарда турар диир. Хамнас да үчүгэй, биһиэхэ үлэ суох, онон өрүү бу диэки кэлэр буоллум диэн кэпсэллээх «Анаабыр Алмаастара» подрядтаах УГМС диэн тэрилтэ үлэһитэ.

 

 

Оставить комментарий

Войти с помощью: