Skip to content

АНОНС

Открылся канал нашего портала в Ютубе - Канал «Якутия. Образ будущего»

КЭМ КЭЛЛЭ.

Өймөкөөн Сэмэнэ

7 декабря 2015 г.

Үрдүк Айыыларбыт айбыттарынан, сир дойду иччитэ этитэн, санаа уган саҥардан саҥалаан, дьайар күүстээх Олох Тыынын күүһүрдэр Күлүүс Сүрүн эрэлин анаан, талан диэххэ дуу, иҥэрэн иитиэхтиир, тустаах дьон дьолугар төрүүр үтүө дьоннордоох буолар.
Бу кэрэ дьон, төрүт түөлбэлэрин өрө көтөҕөр өркөн өй муудараһын иҥэринэр, иитиллэр кэмнэригэр соччо өйдөммөт, да буоллаллар, кэмнэрэ кэллэҕинэ, ситимнэрэ ситтэҕинэ сайыннарбыт саргылаах санаалара улуу эбэ үтүө сүмэһиннээх уутун курдук  норуот өйүгэр- санаатыгар, силис- тирэх буолар ситимнэрин угуттаан бүтүн омук бу орто туруу бараан дойдуга  туруулаһан сайдар баараҕай Аал Луук Маһын көҕөрдөн чэлгитэр, тылыннарар күүстээх  аналлаахтар.
Ол курдук, Мандар Уус барахсан, саха дьонун дьолугар кэлбит кэрэ киһибит буолар.
Төһө киһи, соччо санаа. Ол эрэн былыр да, быйыл да норуот ис күүһэ, ис кыаҕа, сайдар таһыма хаһан баҕарар кини ил тутан түмсүүтүгэр, сомоҕолоһуутугар, биир сүрүннэниитигэр тирэҕирэн олоҕурар .
Билигин уустук курдук эрээри дьикти уонна судургу  кэм кэлэн турар.
Дьиктитэ судургутугар  олоҕурар. Дьиҥэр бу орто дойдуга туох барыта түмүлүннэҕинэ күүһүрэрэ, уохтанара бу айылҕа сокуона. Биир дойдулаах, биир төрүттээх, биир тыллаах, биир итэҕэллээх дьон интириэспитин көмүскүүрбүтүгэр биир өйгө, санааҕа тирэҕирэн сүбэ булунан бу орто туруу бараан дойдуга сэниэлээх олоҕу- дьаһаҕы тэринэн олорор табыллар кыахтаах даҕаны, оннук буолуохтаах даҕаны. Судургута ити…
Өй- санаа өргөс өттө силигэ ситэн сайдар- тыллар аналынан хоҥунна.
Кэмэ кэллэҕэ. Санаабытын сырдык өттүгэр салайан, түҥ былыргыттан тыыннаан аҕалбыт Аар Айыыларбыт алгыстарынан Айыы үөрэҕин итэҕэлин тула тутуһар туура оҥостон сомоҕолоһон олохпут оҥкулун түстэниэх.
Мандар Уус, бүтүн саха дьонун сэргэтин түмэр,ил- эйэ ситимин сомоҕолуур үтүө күүс күлүүһүн арыйар аналлаах кэлбит киһибит буолар.
Кини иитиэхтээн сайыннарбыт саргылаах санаатын тула саха саҥалаах түмсэн, өй – санаа үтүөтүн салайсан, күүс- кыах кыттыһан, мунньуһан сиэрдээх олох суолун солоһор күүстээх дьайыылар кыахтарын түмэн, омукпут бу орто туруу бараан дойдуга Сайдар Сүрүн күүһүрдэн көтөҕүөх.
Арылы Аартык арылынна,
Айыы Тыына билиннэ,
Айыы киһитэ  ситтэ,
Аан дайдыга анала
Айыы Үөрэҕэ – бу Сиргэ!

Оставить комментарий

Войти с помощью: